ایلان بالاسی
بؤیویور کؤرپه ایلان بالاسی
گاه او باشا گاه بو باشا سورونور
رامیز روشنین بو شئری هر زامان دیلیمده اولار. بیزیم دونیامیز، یاشادیق گونلریمیز، بو ایلان بالاسینین دونیاسینا بنزر. یاشماقین وبلاقینا باخیردیم یئنه بو شئری گوردوم. یایینلامیش بیر کیتابدان خبر وئریب. بو کیتابی هله گورمهمیشم. آمما رامیزین شئری هر حالدا اوخومالی اولار…
ایلان بالاسی
بؤیویور کؤرپه ایلان بالاسی
گاه او باشا گاه بو باشا سورونور
سئوینیر اوددوغو هاوایا سویا
تورپاغا سئوینیر داشا سئوینیر
بیرسئوگی هوسی دولور جانینا
گئجهلرگؤزونون ایتیر یوخوسو
چیچه یین قوخوسو
اوتون قوخوسو
کولهیین نفسی دولور جانینا
…اؤزوندن خبرسیز سسسیز- سمیرسیز
زهَره چئوریلیر جانیندا هر شئی…
بوایلان بالاسی بیر واخت جانیندا
گیزلهنن زهردن خبر توتاجاق
بلکه قارغییاجاق باختینی اوندا
بلکه بوغازینی قهر توخاجاق
آغلاما، آغلاما ایلان بالاسی،
باختینی قارغیما ایلان بالاسی!
بو دا بیر عؤموردو
دؤزهسن گرک
بئلهیمیش طالعین امری بویروغو
دؤشونون آلتیندا سئون بیر اورهک
دیشینین آلتیندا زَهَر تولوغو
گؤرنلر چیغیرار:
-ایلان وار، ایلان!…
قوودوقجا قووارلار سنی دونیادا.
هر یئردن کسیلر یولون-یولاغین
تک بیرجه یول قالار سنه دونیادا
باشیندان
قویروغوناجان،
زَهَرلی دیشیندن
قویروغوناجان
تک بیرجه یول قالار،-
او یول اؤزون سن
اؤزون اؤز یولونسان ایلان بالاسی
اؤزون بو دونیادا اؤز عزیزینسن
اؤزون اؤز بالانسان ایلان بالاسی
هارا قاچاجاقسان
گؤز قاباغیندان
بو ظالیم دونیایلا نئیلهیهجکسن؟
یوز یول چیخاجاقسان
اؤز قابغیندان
اؤزوندن آیریلا بیلمهیهجکسن.
اویرن،
یاواش یاواش اؤزونه اؤیرن
دونیانین هر جوره اوزونه اؤیرن
باریش جانینداکی زهرلی دردله
اییرهنمه اؤزوندن ایلان بالاسی
بلکه ده اَن آجی حقیقت ائله
سن سن یئر اوزونده ایلان بالاسی
سن سن حاققین یولو بو یئر اوزونده
تانری اؤزو سئچیب بو یولو بلکه.
یوز جور صیفتییله، یوز جور اوزویله
دونیا سندن کئچیب دورولور بلکه…